കേരള പ്രസ് അക്കാദമി അവാര്‍ഡ്: തീയതി നീട്ടി
കേരള പ്രസ് അക്കാദമിയുടെ 2013-ലെ ജേര്‍ണലിസം അവാര്‍ഡുകള്‍ക്ക് എന്‍ട്രികള്‍ സ്വീകരിക്കുന്നത് മെയ് 31 വരെ നീട്ടി. 2013 ജനുവരി ഒന്നു മുതല്‍ ഡിസംബര്‍ 31 വരെ മാധ്യമങ്ങളില്‍ പ്രസിദ്ധീകരിച്ച റിപ്പോര്‍ട്ടുകളാണ് അവാര്‍ഡിന് പരിഗണിക്കുക.
ദിനപത്രങ്ങളിലെ മികച്ച എഡിറ്റോറിയലിനുള്ള വി.കരുണാകരന്‍ നമ്പ്യാര്‍ അവാര്‍ഡ്, മികച്ച അന്വേഷണാത്മക റിപ്പോര്‍ട്ടിനുള്ള ചൊവ്വര പരമേശ്വരന്‍ അവാര്‍ഡ്, മികച്ച പ്രാദേശിക ലേഖകനുള്ള ഡോ:മൂര്‍ക്കന്നൂര്‍ നാരായണന്‍ അവാര്‍ഡ്, മികച്ച ഹ്യൂമന്‍ ഇന്ററസ്റ്റ് സ്റ്റോറിക്കുള്ള എന്‍.എന്‍.സത്യവ്രതന്‍ അവാര്‍ഡ്, മികച്ച ന്യൂസ് ഫോട്ടോഗ്രാഫര്‍ക്കുള്ള പ്രസ് അക്കാദമി അവാര്‍ഡ്, മികച്ച ദൃശ്യ മാധ്യമപ്രവര്‍ത്തകനുള്ള അവാര്‍ഡ് എന്നിവയ്ക്കാണ് എന്‍ട്രികള്‍ ക്ഷണിച്ചത്. മികച്ച ദൃശ്യ മാധ്യമപ്രവര്‍ത്തകനുള്ള അവാഡിന് വാര്‍ത്താ റിപ്പോര്‍ട്ടിംഗ്, അവതരണം, ക്യാമറ, എഡിറ്റിംഗ് തുടങ്ങിയ ഏത് രംഗത്തെ മികവും പുരസ്‌കാരത്തിന് പരിഗണിക്കും.
റിപ്പോര്‍ട്ടില്‍ ലേഖകന്റെ പേര് വച്ചിട്ടില്ലെങ്കില്‍ സ്ഥാപനത്തിന്റെ മേലധികാരിയുടെ ഇതു സംബന്ധിച്ച സാക്ഷ്യപത്രം ഹാജരാക്കണം. എന്‍ട്രിയുടെ ഒരു ഒറിജിനലും മൂന്ന് കോപ്പികളും സഹിതം മെയ് 31-നകം സെക്രട്ടറി, കേരള പ്രസ് അക്കാദമി, കാക്കനാട്, കൊച്ചി-682 030 എന്ന വിലാസത്തില്‍ ലഭിക്കണം. പ്രിന്റില്‍ പ്രസിദ്ധീകരിച്ച മലയാളം, ഇംഗ്ലീഷ് പത്രങ്ങളിലെ റിപ്പോര്‍ട്ടുകള്‍ക്കു പുറമെ വാര്‍ത്ത/വാര്‍ത്താ ഫീച്ചറുകള്‍ എന്നിവ ഓലൈനില്‍ പ്രസിദ്ധീകരിച്ചതും അവാര്‍ഡിന് പരിഗണിക്കും.
ടെലിവിഷന്‍ സ്ഥാപനങ്ങളില്‍ നിന്നും പ്രേക്ഷകരില്‍ നിന്നും മാധ്യമപ്രവര്‍ത്തകരില്‍ നിന്നും എന്‍ട്രികള്‍ സ്വീകരിക്കുന്നതാണ്. പ്രേക്ഷകര്‍ക്ക് പ്രസ് അക്കാദമി വിലാസത്തിലോ mail@pressacademy.org -ലോ ശുപാര്‍ശകള്‍ അയയ്ക്കാവുന്നതാണ്.
ഇരുപത്തി അയ്യായിരം രൂപയും പ്രശസ്തി പത്രവുമാണ് പുരസ്‌കാര ജേതാക്കള്‍ക്ക് ലഭിക്കുക.