കേരള മീഡിയ അക്കാദമിയുടെ 2014-ലെ അവാര്‍ഡുകള്‍ക്ക് എന്‍ട്രികള്‍ സ്വീകരിക്കുന്നത് മെയ് 8 വരെ ദീര്‍ഘിപ്പിച്ചു. 2014 ജനുവരി ഒന്നു മുതല്‍ ഡിസംബര്‍ 31വരെ മാധ്യമങ്ങളില്‍ പ്രസിദ്ധീകരിച്ച റിപ്പോര്‍ട്ടുകളാണ് പരിഗണിക്കുക.

ദിനപത്രങ്ങളിലെ മികച്ച എഡിറ്റോറിയലിനുള്ള വി.കരുണാകരന്‍ നമ്പ്യാര്‍ അവാര്‍ഡ്, മികച്ച അന്വേഷണാത്മക റിപ്പോര്‍ട്ടിനുള്ള ചൊവ്വര പരമേശ്വരന്‍ അവാര്‍ഡ്, മികച്ച പ്രാദേശിക ലേഖകനുള്ള ഡോ.മൂര്‍ക്കന്നൂര്‍ നാരായണന്‍ അവാര്‍ഡ്, മികച്ച ഹ്യൂമന്‍ ഇന്ററസ്റ്റ് സ്റ്റോറിക്കുള്ള എന്‍.എന്‍.സത്യവ്രതന്‍ അവാര്‍ഡ്, മികച്ച ന്യൂസ് ഫോട്ടോഗ്രാഫര്‍ക്കുള്ള മീഡിയ അക്കാദമി അവാര്‍ഡ്, ദൃശ്യ മാധ്യമരംഗത്തെ മികച്ച പ്രവര്‍ത്തനത്തിനുള്ള അവാര്‍ഡ് (പ്രോഗ്രാമിന്റെ റിപ്പോര്‍ട്ടര്‍, എഡിറ്റര്‍, ആങ്കറിംഗ് ചെയ്തവര്‍, ഫോട്ടോഗ്രാഫേഴ്‌സ് എന്നിവരില്‍ ഏറ്റവും മികവു പുലര്‍ത്തിയ ആളെ അവാര്‍ഡിന് പരിഗണിക്കും. ഡിവി ഫോര്‍മാറ്റ്, സിഡി എന്നിവയായി അയയ്ക്കാം). എന്നിവയ്ക്കാണ് എന്‍ട്രികള്‍ ക്ഷണിച്ചത്.
റിപ്പോര്‍ട്ടില്‍ ലേഖകന്റെ പേര് വച്ചിട്ടില്ലെങ്കില്‍ സ്ഥാപനത്തിന്റെ മേലധികാരിയുടെ ഇതുസംബന്ധിച്ച സാക്ഷ്യപത്രം ഹാജരാക്കണം. എന്‍ട്രിയുടെ ഒരു ഒറിജിനലും മൂന്ന് കോപ്പികളും സഹിതം 2015 മെയ് 8-നകം സെക്രട്ടറി, കേരള മീഡിയ അക്കാദമി, കാക്കനാട്, കൊച്ചി-682 030 എന്ന വിലാസത്തില്‍ ലഭിക്കണം. കവറിന് പുറത്ത് ഏത് അവാര്‍ഡിനുള്ള എന്‍ട്രിയാണെന്ന് പ്രത്യേകം രേഖപ്പെടുത്തണം.
2014-ലെ ദൃശ്യമാധ്യമ പ്രവര്‍ത്തകനുള്ള അവാര്‍ഡിന് പ്രേക്ഷകര്‍ക്കും പേര് നിര്‍ദ്ദേശിക്കാവുന്നതാണ്. ഏത് മേഖലയിലെ ഏത് പ്രോഗ്രാമാണ് ശുപാര്‍ശ ചെയ്യുന്നത് എന്നും രേഖപ്പെടുത്തണം. പ്രേക്ഷകര്‍ക്ക് മീഡിയ അക്കാദമി വിലാസത്തിലോ mail@pressacademy.org -ലോ ശുപാര്‍ശകള്‍ അയയ്ക്കാവുന്നതാണ്.
ഇരുപത്തി അയ്യായിരം രൂപയും പ്രശസ്തി പത്രവുമാണ് പുരസ്‌കാര ജേതാക്കള്‍ക്ക് ലഭിക്കുക.