പുർകായസ്ത – സുപ്രിംകോടതിവിധി മാധ്യമ സംരക്ഷണത്തിന് കരുത്തു പകരുന്നതാണ്

ഓൺലൈൻ ന്യൂസ് പോർട്ടലായ ന്യൂസ് ക്ലിക്ക് സ്ഥാപകനും എഡിറ്റർ ഇൻ ചീഫുമായ പ്രബീർ പുർകായസ്തയെ തടവറയിൽ നിന്നും മോചിപ്പിച്ച സുപ്രിംകോടതിവിധി മാധ്യമ സംരക്ഷണത്തിന് കരുത്തു പകരുന്നതാണ്.
ഭരണകൂടത്തിന്റെ നെറികേടും നീതികേടും തുറന്നുകാട്ടുന്ന മാധ്യമങ്ങളെ വേട്ടയാടുന്ന ഭരണകൂട ഭീകരതയ്ക്കുള്ള ചുട്ടപ്രഹരമാണ് സുപ്രിംകോടതി വിധി.
ന്യൂസ്‌ക്ലിക്ക്, ചൈനയിൽനിന്നും പണം വാങ്ങി ഇന്ത്യയുടെ പരമാധികാരം തകർക്കാനും, രാജ്യത്തിനെതിരെ ശത്രുത വളർത്താനും വാർത്ത നൽകി എന്ന കള്ളക്കഥയിൽ രചിച്ച കള്ളക്കേസാണ് പുർകായസ്തയ്ക്കുമേൽ ചുമത്തിയത്.
2023 ഒക്ടോബർ 3ന് ഡെൽഹി സ്പെഷ്യൽ പൊലീസ് പുർകായസ്തയേയും എച്ച് ആർ മാനേജർ അമിത് ചക്രവർത്തിയേയും യുഎപിഎ പ്രകാരമാണ് അറസ്റ്റുചെയ്തത്.
അറസ്റ്റും റിമാന്റിൽ വിട്ടതും നിയമവിരുദ്ധമാണെന്നാണ് ജസ്റ്റിസ് ബി ആർ ഗവായി, ജസ്റ്റിസ് സന്ദീപ് മേത്ത എന്നിവരടങ്ങിയ ബെഞ്ചിന്റെ ഉത്തരവ്. 77 പിന്നിടുന്ന പുർകായസ്ത അനീതിക്കുമുന്നിൽ ഇന്നും ജ്വലിക്കുന്ന തീപന്തമാണ്.
പൗരാവകാശ പ്രവർത്തകനും മാധ്യമ സാരഥിയും എഴുത്തുകാരനുമായ പുർകായസ്തയുടെ ഇനിയുള്ള നിയമപോരാട്ടങ്ങളിലും മീഡിയ അക്കാദമി ഒപ്പമുണ്ടാകും.

ആര്‍.എസ്.ബാബു
എഡിറ്റര്‍ ഇന്‍ ചീഫ്